Tsarin Fansho Na Jihar Jigawa Ya Yi Wa Sauran Jihohi Zarra- Premium Pension
Published: 21st, February 2025 GMT
Hukumar bayar da gudunmawar fansho ta Jihar Jigawa da Kananan Hukumomin jihar ta kulla yarjejeniyoyi da wasu mashahuran Hukumomin Asusun Fansho guda shida (PFA) da nufin tabbatar da tafiyar da kudaden fansho na jihar yadda ya kamata.
Shugaban ma’aikata na jiha Alhaji Muhammad K Dagaceri wanda ya jagoranci rattaba hannu kan yarjejeniyar a madadin gwamnatin jihar Jigawa a gidan fensho na Dutse ya ce taron yana kara jaddada kudirin gwamnati na tabbatar da gaskiya da inganci a tsarin tafiyar da fansho.
Ya kuma jaddada mahimmancin kula da harkokin kudi da kuma bukatar samar wa wadanda suka yi ritaya kudaden fansho domin ci gaba da gudanar da rayuwarsu.
“Wannan yarjejeniya ta nuna wani gagarumin ci gaba a kokarin da muke yi na ganin cewa ma’aikatanmu da suka yi ritaya sun samu haƙƙinsu a kan lokaci.”
Alhaji Muhammad Dagaceri ya ci gaba da bayyana cewa, an zabo shugabannin asusun fansho ne ta hanyar tantancewa.
A cewarsa, masu gudanar da ayyukan za su samar da ingantattun ayyukan gudanarwa, da suka hada da dabarun saka hannun jari, da kula da ayyukan asusu da inganta ayyukan abokan ciniki.
Shugaban Ma’aikatan ya ce Hukumar Fansho ta Jihar Jigawa za ta sa ido a kan hadakar, tare da tabbatar da cewa PFA sun bi ka’ida da kuma cika alkawuran da suka dauka ga Jihar da masu karbar fansho.
Ya jaddada sadaukarwar gwamnatin Gwamna Umar Namadi wajen kyautata jin dadin ma’aikatan da suka yi ritaya, yana mai cewa wannan wani bangare ne na kokarin inganta ayyukan gwamnati da kuma kaucewa rikon sakainar kashi a harkokin tafiyar da dukiyar jihar.
Da yake jawabi a madadin hukumomin na PFA Manajan Daraktan Asusun Fansho na Premium Hamisu Bala Idris, ya tabbatar wa hukumar cewa PFA da aka zaba za su ci gaba da aiki yadda ya kamata ta hanyar bin duk wasu sharuddan da ke cikin yarjejeniyar.
Hamisu, ya bayyana tsarin fansho na jihar Jigawa a matsayin wanda ya fi kowanne a fadin kasar nan.
A nasa jawabin, Shugaban Hukumar Fansho ta Jihar Jigawa da Kananan Hukumomi, Dokta Bilyaminu Shitu Aminu ya bayyana cewa, zababbun asusun fansho guda shida da za su kula da dukiyar hukumar su ne, Premium Pension Fund (Lead PFA), da PAL Pension, da GT Pension, da NLPC Pension, da Norrenberger Pension da Cruder.
Dakta Bilyaminu Shitu Aminu ya yabawa Gwamna Malam Umar Namadi bisa gagarumin goyon bayan da ya bayar ga shirin da ya sa Jihar ta zama abin koyi a kasar nan.
Usman Muhammad Zaria
উৎস: Radio Nigeria Kaduna Hausa
কীওয়ার্ড: Jigawa Yarjejeniya Jihar Jigawa jihar Jigawa
এছাড়াও পড়ুন:
Jigawa Za Noma Rabin Shinkafa Da Ake Amfani Da Ita A Nigeria Nan Da 2030
Gwamna Umar Namadi na jihar Jigawa ya ce gwamnatinsa na shirin bayar da gudunmawar kashi 50 na shinkafar da Najeriya ke bukata nan da shekara ta 2030.
Ya bayyana haka ne a lokacin da yake karbar tawagar hukumar tattara kudaden shiga da kasafi (RMAFC) karkashin jagorancin shugaban kwamitin inganta kasafin kudi da kasafin kudi, Ambasada Desmond Akawor, yayin ziyarar ban girma da suka kai a gidan gwamnati dake Dutse.
Ya bayyana cewa, suna noman shinkafa sau biyu a shekara, inda ya nuna cewa, a shekarar 2024 kadai, sun noma sama da hekta 200,000 na shinkafa.
Ya yi nuni da cewa, a bana, suna son noma sama da hekta 250,000 wanda a shekarar 2030, burinsu ya kai kadada 500,000.
Malam Umar Namadi ya ce, a irin takun da suke tafiya za su cimma hakan cikin sauki.
“Babban burinmu shi ne mu ba da gudummawar metric ton miliyan 3.6 na shinkafa kowace shekara don noman shinkafar Najeriya – wanda ke wakiltar kusan kashi 50% na abin da al’ummar kasar ke bukata. Muna da kasa, jama’a, da siyasa don ganin hakan ta tabbata.”
Gwamna Namadi ya ce har yanzu noma shi ne jigon tattalin arzikin Jigawa, inda kusan kashi 85% na al’ummarta ke tsunduma a wannan fanni, inda ya ce gwamnatinsa ta samu nasarorin tarihi a harkar noman rani a yankunan da ba su da yawa a jihar.
Dangane da tallafin albarkatun kasa, gwamnan ya bayyana irin ma’adinan da ba a yi amfani da su a Jigawa ba, ciki har da mai, amma ya bayyana yadda gwamnati ke taka-tsantsan wajen wanzar da zaman lafiya da tsaro.
Tun da farko, shugaban tawagar RMAFC ya shaida wa gwamnan cewa ziyarar na daga cikin ayyukan da kwamitin ya ba su na tantance ayyukan da suka dace a matakin jihohi ta hanyar ware kudaden shiga na musamman na kasa da kashi 1.68 cikin 100 da nufin karkatar da tattalin arzikin Najeriya, tare da mai da hankali kan noma, yawon bude ido, da ma’adanai masu inganci.
Ya ci gaba da cewa kwamitin ya yaba da yadda aka fara gabatar da jawabai da ziyarce-ziyarcen wuraren da aka fara yi, musamman irin abubuwan da suka shafi albarkatun kasa a jihar, kuma za su ci gaba da duba harkokin noma tare da baiwa gwamnan tabbacin tantance gaskiya.
Ya kuma jaddada muhimmancin amfani da albarkatun kasa domin bunkasar tattalin arziki.
KARSHE/USMAN MZ
Gwmana Lawal Ya Bayyana Wa UNICEF Shirin Jihar Zamfara Na Ƙaddamar Da Dokar Kare Al’umma